'Top Hat' (1935) - Fred Astaire eta Ginger Rogersen dotorezia

Filma musikalei buruz hitz egiten dugunean, konkretuki Hollywoodeko urrezko aroan ekoiztutako horien inguruan (1930-1950 bitartean egindakoak, gutxi gora behera), bada berehala burura etortzen zaigun bikote bat: Fred Astaire eta Ginger Rogers.

Fred Astaire ez zen aktore ala dantzari atletikoena, Ginger Rogers ez zen abeslari onena… baina batera tandem perfektua osatzen zuten. Pantaila handian konplize izateaz aparte, karismaz betetako dantzariak ziren. Dotoreak, klasedunak, estilosoak, pikardia apur bat zuten ere… baina guzti horren gainetik, Fred Astaire eta Ginger Rogersek kimika ikaragarria zuten. Bikotea dantzatzen ikustean primeran pasatzen dugu, nolabait, liluratuta gelditzen gara pantaila aurrean. Xarma berezia zuten.

Oker ez banago, hamar pelikula inguru egin zituzten batera. Egindako pelikula horiek pareko premisak jarraitzen zituzten, eta egia esanez, ez dute zinemaren historia “toki” handirik, baina horrek ez du axola. Izan ere, lehen notak entzutean eta Fred Astaire eta Ginger Rogers dantzan hasten direnean, txundituta gelditzen gara.

Hori guztiagatik, blogean tokitxo bat merezi dutela pentsatzen dut, eta horretarako aukeratu dudan pelikula ‘Top Hat’ musikala izan da (eurek partekatu zuten filmografian dagoen musikal aipagarrienetakoa). Gaizki-ulertze eta iruzurrez betetako istorio sinplea da, erritmo ona duena, gag dibertigarriak, abesti ederrak eta orokorrean pelikula oso entretenigarria. 

Dale Tremont (Ginger Rogers) modelo bat da, eta beti bere modistarekin dabil, Alberto Beddinirekin. Jerry Travers (Fred Astaire) AEBetan arrakasta handia lortu duen komedia musikalen izar bat da. Berarekin Hardwick doa, bere azken lanaren ekoizlea. Azken horren emazteak, ezkontzaginaren papera bete nahi du Tremont eta Traversen artean.

Pelikula aztertzeko edo gogora ekartzeko modu aproposena bertan azaltzen diren une musikalen errepasoa egitea da. Abestiak une egokian ageri dira, eta ez dute istorioa batere oztopatzen, narrazioa laguntzen dute. Gauza berbera gertatzen da dantza uneekin. Kasu honetan, abestiak eta dantzak sedukzio jokoaren pieza izango dira:

Isn’t this a lovely day

Kiosko bat, euria… inprobisatutako zita bat. Dale Tremontek hasieran ez du Jerry Traversengan interesik. Eszena honetan ageri den moduan, apurka-apurka Tremont Traversen jokoan parte hartzen doa, eta noski, gustuko du. Koreografia dibertigarri, atsegin eta nahiko adierazkorra. “Flirteo” unea dantza eta musikaren bidez adierazia.

Cheek to cheek

Klasiko bat, berriro ere letra eta dantza era perfektuak funtzionatzen dute. Ezinezkoa da irribarre bat ez erakustea bi hauek dantzatzen duten bitartean. Dotorezia fotograma bakoitzean.

Top Hat

Pelikulari izenburua ematen dion abestia dugu hau. Fred Astaire eszena indibiduala, berak parte hartutako musikal guztietan berarentzat eszena bat erreserbatzen omen zuen beti. Abesti ona, pajarita zuria, kapela luzea… Estiloa!