2/9/13

'Kick Ass 2' (2013) - Hit Girl eta Kick Ass, borrokarako prest


Kritika honek Kick Ass (2010) pelikularen spoilerrak ditu

2010ean ‘Kick Ass’ pelikula estreinatu zen, Mark Millarren komikiaren moldaketa zinematografikoa. Dave Lizewskiren (Aaron Johnson) nondik norakoak kontatzen dizkigu istorioak, nola egun batetik bestera superheroi bat bihurtzea erabaki zuen (zergatik ez?). Daven ustez, gizartearentzat ez litzateke txarra izango superheroi bat izatea, bere ideia gauzatzeko bizitza arriskuan jarriko du. Sekulako jipoia jasan ondoren eta zenbait ebakuntza gainditu eta gero, Davek sentsibilitatea galduko du (etorkizuneko kolpeak jasotzeko “abantaila” bat). Beraz, mozorro berde eta hori bat jantzita heroi bat balitz bezala jokatuko du. Egun batetik bestera, munduaren arreta deituko du, izar mediatiko bat da orain. Baina berarentzat joko bat baino ez dena, beste batzuentzat seriotasun handiko kontua da.


Kick Assen bizitza hankaz gora jarriko da Hit Girl (Chloë Grace Moretz) eta Big Daddy (Nicholas Cage), horren aita, ezagutzen dituenean. Heroismoaren inguruan zuen pertzepzioa guztiz aldatuko da une horretatik aurrera. Aita eta alabak benetako superheroiak balira bezala jokatzen dute, arma ugari dituzte, jada zenbait pertsona hil dituzte… Esan bezala, ez da joko hutsa. Kick Ass ez bezala, horien erabakiak muturrekoak dira. Hiruren artean, mendeku bila, Frank D’Amico (Mark Strong) bilatu eta hilko dute. Mafiosoa eroriko da, baina ez da bakarra izango.


Hiru urte geroago superheroi bitxi horiekin topo egingo dugu berriro, atal zinematografiko berri batean: Kick Ass 2. Kick Assen ekintzak pertsona ugarirentzat inspirazio izan dira, eta orain gizartea superheroiez beteta dago. Stars and Stripes koronela (Jim Carrey), superheroi horien zuzendari eta antolatzaile izango da (base sekretu eta guzti). Kick Ass laster talde horretara batu egingo da, bakarrik ez dagoela sentitzeko. Taldearen izena, Justice Forever izango da.

Superheroi pelikula guztietan bezala, honetan"superdoilor" bat dugu. Red Mist (Christopher Mitz-Plasse) aitaren heriotzagatik, Frank D’Amicoren hilketagatik, mendekatu nahi da. Kick Assen heriotza desiratzen du. Orain bakarrik gelditu da, eta bere pertsonaia birsortzeko une aproposa da, besteen errespetua ere lortu nahi du. Red Mist iraganeko kontua da jada, orain izen berri bat izango du: The MotherFucker. Horretaz gain, arma boteretsuena bere esku izango du: dirua.


Bi talde, ongia vs gaizkia; eta erdian, promesa bat bete behar duen neskato bat: Hit Girl. Mindy Macready aitaren lagun batekin bizi da, Marcusekin. Marcusen ustez, Mindyk ez du haurtzaro arrunt bat izan. Bere gustura moldeatu nahi du, gizartearen kanonen arabera, eta horretarako bere baitan daraman superheroia “lurperatzeko” eskatuko dio. Horregatik, bigarren atal honetan dilema eta zalantza gehiago izango dituzte pertsonaiek, lehen atala baino “filosofikoagoa” dela esan daiteke. Norbanakoak bere benetako izaera izkutatu behar du gizartearen parte izan ahal izateko? Heroi bat izatea merezi ote du? Zalantza horiek erantzuna izango dute, apurtutako promesen pelikula honetan.


‘Kick Ass 2’ pelikulan Mindyren pertsona hobeto ezagutuko dugu, eta berak institutuan bizitako esperientziak. Eszena horiek protagonista (eta pelikularen) umore beltza mantentzen dute eta ohiko “institutuko neska estereotipatuen” parodia gisa ikus ditzakegu. Hit Girlek ez du zertan “neskato arrunt” bat bezala jantzi behar, berak badaki nor den, eta hori ez du aldatu nahi. Esperientziari esker, sendoago sentituko da. Izan ere, Hit Girl eszenan ageri den bakoitzean, guztia hobera egiten du. Hit Girl umiliatuko dute, baina baita ikasiko du. Kick Ass inoiz baino gehiago sufrituko du, baina behingoz nor izan nahi duen erabakiko du. ‘Batman eta Robin’ modura bizitako abentura berri bat, zenbait gauza aurreikusi ditzakegun arren, ikustea merezi duena.

Oraingoan ez da Matthew Vaughn zuzendari, Jeff Wadlow baizik. Hori bai, Vaughn proiektuan jarraitzen du gidoian eta produkzioan parte hartu duelako. Akzio eszenak ikusgarriak dira (batez ere amaierakoak), baina modu kaotiko batean grabatuta daudela iruditu zait, kamera mugimendu gehiegi. Zentsu horretan, lehenengoaren forma gehiago gustatzen zait, “garbiagoa” delako.

Soinu banda lehenengo atalaren soinu banda bezain ona da, eta modu berean erabilita dago: akzio eszenetan ukitu komiko eta gehiegizko bat gaineratzeko. Aktore taldea, lehen pelikularen tonuan mantentzen dira. Aaron Johnson Kick Ass perfektu bat da, baina aurrekoan bezala pelikularen izar handiena Chloë Grace Morez da, hau da, Hit Girl. Batera, bikote protagonista oso on bat osatzen dute.

Laburtuz, Kick Ass 2 bigarren parte on bat da, pelikula oso entretenigarria, umore beltz gehiago, akzio gehiago, biolentzia gehiago eta dilema berriak topatzen ditugu bertan. Pelikulak espero genuena eskaintzen du. Entretenimendu hutsa.


Kreditu osteko eszena bat dago, beraz… Hirugarren atal bat egongo da? Dirudienez, bai. 

No hay comentarios:

Publicar un comentario