20/8/12

'Knocked Up' (2007) - Heldugabeak, erretzaileak eta hardunaldiak



Ben mutil heldugabea da, egun osoa ematen du lagunekin marihuana erretzen eurek sortutako webgune “originala” etekinak noiz emango dizkien zain. Benek ez du helbururik, etorkizunak ez dio gehiegi kezkatzen. Allison, aldiz, etorkizun oparoa izan dezakeen kazetaria da. Allison haurdun geratuko da espero gabe Benekin gau zoro bat igaro ondoren.

‘Knocked Up’ komedia behin baino gehiago ikusi dut, eta gaur egun “amerikar komedia berria” deritzonaren eredu ona dela pentsatzen dut. Judd Apatow dago pelikularen zuzendaritza eta gidoiaren kargu. Istorioak era koherentean nahasten ditu komedia erromantikoa eta komedia eskatologiko eta lizunena.

Ondo egituratutako komedia da. Gidoia landuta dago eta pertsonaiak ondo eraikita, protagonisten eta gainontzeko pertsonaien arteko harremanak ondo definituta daude eta heldugabeko “familia” bitxi bat osatzen dute guztien artean. Komediako pertsonaiek xarma naturala dute.


Pelikularen pertsonaiak, orokorrean komedia mota honetako pertsonai orok, Peter Panen sindromearen menpe bizi dira, ez dute heldu bihurtu nahi, ez dituzte ardurarik nahi. ‘Bridesmaids’ komedia bikaina heldu zen arte, gizonezkoak izan dira nagusi genero honetan. Protagonistek soilik sexuaz hitz egiten dute eta ez dira heldu bihurtuko ezusteko batek horretara behartu arte, kasu honetan: Allisonen haurdunaldia.

‘Knocked Up’ komediak, nahiz eta zenbaitetan egoerak puztu, naturaltasunaren alde egiten duten komedia multzo baten parte da. Komedia ona iruditzen zait.

Aktore, gidoilari eta zuzendari “familia” honen estiloa hobeto ulertzeko gomendapen bat: ‘Freaks & Geeks’ telesaila.

‘Freaks & Geeks’ kasualitatez aurkitu nuen eta orain nire faboritoen artean dago. Komedia belaunaldi berri hau hobeto ulertzeko pieza klabe edo inflexio puntua dela uste dut. Telesaila Judd Apatowek ekoiztu zuen eta horretan Paul Feig zuzendariak parte hartu zuen (‘Bridesmaids’, ‘Bored to death’ (TV)). Seriea telebistatik kendu zuten, baina “familiak” aurrera jarraitu zuen eta ‘Undeclared’ telesaila egin zuten, oraingoan, Greg Mottola (‘Adventureland’, ‘Superbad’, ‘Arrested Development’ (TV)) zuzendaria batuko zitzaion familiari.

Komedia familia honen kide batzuk: Seth Rogen, Jason Segel, James Franco, Martin Starr, Bill Hader, Steve Carell, Paul Rudd, Kristen Wiig, Melissa McCarthy, Leslie Mann, Jonah Hill, Michael Cera, Judd Apatow, Greg Mottola, Paul Feig…


No hay comentarios:

Publicar un comentario